آگ لگنے سے 2 بچیاں پچھلی سیٹ پر پھنس گئیں، راہگیر نے کار کے دھماکے سے پھٹنے سے چند سیکنڈ قبل دونوں کو ریسکیو کرلیا

امریکی ریاست ایریزونا میں  سیم ہیلر نامی ایک بہادر شخص نے دو چھوٹے بچوں کو جلتی ہوئی کار سے اس کے پھٹنے سے چند سیکنڈ قبل باہر نکال لیا۔  فوکس نیوز کی ایک رپورٹ کے مطابق سیم ہیلر اور ان کی اہلیہ میلیسا چھٹی کے لیے جارہے تھے کہ اسی دوران انہوں نے ناواجو کاؤنٹی  میں کار کو آگ لگی دیکھی۔

سیم  ہیلر نے بتایا کہ دونوں لڑکیوں کے والدین کار کی اگلی سیٹوں سے باہر نکلے اور اپنے دروازے بند کردیے جس کی وجہ سے دونوں بچیاں پچھلی سیٹوں پر پھنس گئیں۔ جب انہوں نے بچوں کو نکالنے کیلئے دروازے کھولنے کی کوشش کی تو وہ نہیں کھلے جس پر والدین حواس باختہ ہوگئے، انہوں نے رونا اور چیخنا چلانا شروع کردیا، اس دوران وہ ہاتھوں سے کھڑکیوں کے شیشے توڑنے کی کوشش کرتے رہے۔

سیم ہیلر کے مطابق آگ تیزی سے پھیلتی جا رہی تھی، اس نے اور بچوں کے والدین نے پچھلی ونڈو کو پتھر مار کر توڑنے کی کوشش کی لیکن کامیابی نہیں ہوسکی۔ اس کے بعد اس نے فیصلہ کیا کہ دروازے کا شیشہ توڑا جائے۔ اس نے پتھر مار کر دروازے کا شیشہ توڑا اور دونوں بچیوں کو باہر نکال لیا۔ بچوں کو ریسکیو کرنے کے چند ہی سیکنڈ بعد آگ فیول ٹینک تک پہنچ گئی اور ایک زور دار دھماکے سے پھٹ گئی۔